Өлкөдө 6 ай аралыгында кылмыштуулуктун саны өсүп, көбү Бишкек жана Чүйдө катталды

Өлкөдө 6 ай аралыгында кылмыштуулуктун саны 1 жарым эсеге өстү. Бул тууралуу Башкы прокуратуранын маалыматына таянып Улуттук статистикалык комитеттен кабарлашты.

Маалыматта айтылгандай, 2021-жылдын январь-июнь айларында республиканын аймагында 23 миң 500 кылмыш катталган. Бул былтыркы жылдын 6 айдагы көрсөткүчүнө салыштырмалуу 1 жарым эсеге көбөйгөн, ошондой эле 12 миңге жакын жоруктар (дээрлик 30 пайызга көп) катталган. Кылмыштардын басымдуу бөлүгү (61 пайыздан ашык) Бишкек шаарында жана Чүй облусунда жасалган.

Кылмыштардын 2 миңден ашыгы оор жана өзгөчө оор кылмыштарга туура келген. Бул кылмыштардын негизги бөлүгүн менчикке каршы кылмыштар түзгөн. 2020-жылдын январь-июнь айларына салыштырмалуу жалпы республика боюнча алардын саны 1,6 эсеге, анын ичинде алдамчылык – 2,1 эсеге, уурдоо – 1,5 эсеге, тоноо – 24,5 пайызга өстү.

Адам өлтүрүүнүн саны 26 пайызга, зордуктоо жана зордуктоо максатында кол салуу учурларынын саны 34 пайызга, ден соолукка анча оор эмес зыян келтирүү 6 пайызга көбөйдү.

Ал эми кызмат абалынан кыянаттык менен пайдалануу 36 пайызга, ишенип берилген мүлктү ыйгарып алуу же чыгымдоо учурлары 2,2 эсеге жана паракорлук 1,4 эсеге өстү.

Баңгизаттарды мыйзамсыз жүгүртүүгө байланышкан кылмыштардын саны олуттуу (23 пайызга) көбөйдү.

Кылмыштардын санынын эң көбү Ысык-Көл облусунда (2,4 эсеге), Ош шаарында (1,7 эсеге), Ош облусунда (1,5 эсеге) жана Бишкек шаарында (1,4 эсеге) өсүшү белгиленди.

Январь-июндагы катталган кылмыштардын аймактар боюнча саны:

Ушул жылдын биринчи жарым жылдыгында кылмыш жасаган 13 миңден ашык адам аныкталды, бул өткөн жылдын тийиштүү мезгилине салыштырмалуу 15,6 пайызга көп. Алардын жалпы санынын 17 пайызга жакыны аялдар, 5 пайызга жакыны жашы жете электер.