Таластагы Киров суу сактагычына ГЭС курулат

Бүгүн, 29-июлда президенттин Талас облусундагы ыйгарым укуктуу өкүлү Бакытбек Нарбеков, энергетика жана өнөр жай министри Доскул Бекмурзаев менен жолугушту. Анда тараптар, Киров суу сактагычына ГЭС куруу долбоорун жеринде талкуулашты. Бул тууралуу президенттин Талас облусундагы өкүлчүлүгүнөн билдиришти.

Маалыматка ылайык, учурда ГЭС курула турган аймакка геодезиялык жумуштар жүргүзүлүүдө.

"Министр Доскул Бекмурзаев, ГЭС 30 мегаватт кубаттуулукта болуусу күтүлүп жатканын жана ГЭСтин келечекте ишке кирүүсү, сугат суу системасына эч кандай таасирин тийгизбейт экендиги белгиледи.

Өз кезегинде, Бакытбек Нарбеков, долбоорду демилгелеп алгачкы иш аракеттер менен жерине таанышып жаткан Доскул Бекмурзаевге, Талас элинин атынан ыраазылык билдирди. Ошондой эле, ГЭСтин курулушун ишке ашырууда жана тийиштүү иш кагаздарын мыйзамга шайкеш келтирүүдө ар тараптуу жардам берерин кошумчалады", - деп айтылат мекеменин маалыматында.