"Сиздер үчүн дуба кылуудабыз". Муфтий Замир Ракиев Олимпиадага катышып жаткан спортчуларга ийгилик каалады

Кыргыз мусулмандарынын муфтийи Замир Ракиев Токиодогу Олимпиадага катышып жаткан спортчуларга ийгилик каалады. Бул тууралуу Муфтияттын басма сөз кызматынан билдиришти.

Маалыматка ылайык, муфтий өлкөнүн намысын коргоп жаткан баатыр уул-кыздарыбызга дуба кылып, өлкөбүзгө жеңиш менен кайтып келүүсүн Жараткандан сурарын билдирген.

"Спорт - адам баласынын ден соолугунун башкы булагынын бири. Ал ден соолукту гана чыңдабастан, сергек жашоого дагы үндөйт. Спорт - тынчтыктын тиреги. Азыр эл аралык, жолдоштук мамилелер спорт аркылуу өсүп келет. Учурда өлкөбүздөгү чыгаан уул-кыздарыбыз Токио жайкы Олимпиада оюндарына катышып, мамлекетибиздин намысын коргошууда. Спортчуларыбыз өлкөбүздүн намысын көптөгөн ири эл аралык мелдештерде, анын ичинде Олимпиада оюндарында татыктуу коргоп келишкен жана коргой беришет. Албетте, мелдеш болгондон кийин бирөө жеңет, бирөө жеңилет. Жеңиш жана жеңилүү Алла Тааламдын буйругу менен болот.

Токио жайкы Олимпиада оюндарына катышып жаткан ар бир мекендешибиз мелдеш талаасына чыкканда толкунданып, жеңишке жетсе сүйүнүчүбүздө чек жок болуп турган мезгил. Мекенибиздин намысын коргоп жаткан баатыр уул-кыздарыбызга дуба кылып, өлкөбүзгө жеңиш менен кайтып келүүсүн Алла Тааладан сурайбыз. Биз сиздер менен жана дайыма сиздер үчүн дуба кылуудабыз", - деген муфтий.