Жолдошу 3 кызына алимент төлөбөй жаткан келин менен акыйкатчы Токон Мамытов жолукту

Буга чейин социалдык тармактарда 30 жаштагы Акылай Токтогул кызына жана анын жашы жете элек 3 кызына жардам керектиги тууралуу кайрылуу жарыяланган. Анда жашы жете элек кыздарга ай сайын алынуучу алимент беш айдан бери төлөнбөй жатканы айтылган.

Акыйкатчы Токон Мамытов Акылай Токтогул кызын жана анын кыздарын кабыл алды. Акыйкатчы Токон Мамытов аппараттын кызматкерлерине алимент өндүрүү, турак жай көйгөйү, социалдык төлөмдөр жана башка маселелер боюнча мамлекеттик тийиштүү органдарга каттарды жолдоону тапшырды.

Жолугушуу учурунда Мамытов келинге укуктук кеңеш берип, ага өз каражатынан материалдык жардам да көрсөткөн.

"Жолугушуудан кийин акыйкатчы аппаратынын кызматкерлери жашы жете элек кыздарга беш айдан бери алимент төлөнбөгөн окуянын чоо-жайын бышыктоо үчүн Акылайдын жолдошу менен телефон аркылуу сүйлөштү. Анын жүрүшүндө Нурбек бир айга 5000 сом алиментти которгонун, дагы бир айга беш миң сомду чукул арада которуп берерин убадалады. Ал эми жашы жетпеген кыздары үч ай бою өзү менен жашаганын айтып, алардын кем-карчын камсыздап турганын белгилеп, ал үч айга алимент төлөөнүн кажети жоктугун сотто далилдейм деген. Ошондой эле Акылайдын жолдошу 5000 сом өлчөмүндө алимент төлөө тууралуу соттун чечимин өзгөртүү үчүн сотко кайрыларын маалымдаган. Анткени ал азыр бюджеттик мекемеде иштерин жана айлыгы 4500 сомду түзөрүн белгилеп, эгер сот анын 50 пайызын кыздарга төлөөгө милдеттендирсе, айлыгынын жарымын кыздарын камсыздоого чегерип турарын айткан.

Ал эми келиндин 2 кызы Бишкектеги мектептердин бирине кабыл алынган. Бул окуя акыйкатчынын көзөмөлүндө болмокчу", - деп жазылат маалыматта.