140 үйдүн курулушу жүрүп жатат. Баткенде чек ара жаңжалында зыянга учураган турак жайларды калыбына келтирүү иштери жүрүүдө

Баткен облусунун Лейлек районундагы Кыргыз-Тажик мамлекеттик чек арасындагы окуядан зыянга учураган турак-жайларды калыбына келтирүү иштери кызуу жүрүүдө. Бул тууралуу президенттин Баткен облусундагы өкүлчүлүгүнөн билдиришти.

"Жалпысынан 140 үйдүн курулушу жүрүп жатат. Бүгүнкү күндө анын 80ге жакыны бүтүп калды. 140 үйдү 31-август Эгемендүүлүк күнүнө карата тапшыруу пландаштырылган.

Мындан сырткары социалдык объектилер мектеп, бала бакча, ФАП курулуп жатат. Анан да каргашалуу окуяда каза болгон жарандардын жакындары үчүн 36 үй бардык шарты менен салынып жатат. 36 үйдү да 31-августта тапшыруу пландаштырылган", - деп билдиришти өкүлчүлүктөн.

Жалпысынан Кыргыз-Тажик чек арасындагы жаңжалдын натыйжасында 173 адам жаракат алып, 36 адам каза болгон.