Чек ара кызматы: "Лейлекте Тажикстандын жарандары такталбаган жер тилкесине тосмо кура баштаган"

Баткен облусунун Лейлек районуна караштуу Максат айылында Тажикстандын жарандары такталбаган жер тилкесине тосмо кура башташкан. Бул тууралуу Мамлекеттик чек ара кызматынан билдиришти.

Маалыматка караганда, кечээ, 5-август күнү Максат айылында болжол менен саат 18:30 чамасында такталбаган тилкеде Тажикстандын жарандары үйдүн айланасына тосмо кура башташкан.

"Буга байланыштуу Кыргыз өлкөсү менен Тажикстандын чек ара кызматынын өкүлдөрү сүйлөшүү жүргүзүп, саат 18:50 чамасында курулуш иштери токтотулган. УКМКнын чек ара кызматы мамлекеттик чек аранын кыргыз-тажик тилкесиндеги кырдаалга мониторинг жүргүзүп, чек аранын такталбаган тилкелериндеги ар кандай ишмердүүлүктү тыгыз көзөмөлгө алат", - деп жазылат маалыматта.

Аталган кызматтан бүгүн, 6-августка карата чек арада абал туруктуу экенин белгилешти.