УКМК: "Таалатбек Масадыковдун берген кеңештерине атайын кызмат муктаж эмес"

Коопсуздук кеңешинин төрагасынын орун басары Таалатбек Масадыковдун берген кеңештерине УКМК муктаж эмес. Мындай билдирүүнү Улуттук коопсуздук мамлекеттик комитетинин маалымат кызматынан таратышты.

"УКМК аткаруу бийлигинин маанилүү органы болуп саналат, зарыл болгон учурда конституциялык укугу бар компетенттүү адамдардын кеңештерин жана сунуштарын колдонот. Өз кезегинде УКМК Таалатбек Масадыков конституцияда каралган кызматтык милдеттерине негизделген ыйгарым укуктарын аткарууга чакырат", - деп жазылат маалыматта.

Эске салсак, буга чейин Масадыков журналист Майраш Базлакуновага интервью берип жатып, УКМКга кеңеш берүүгө даяр экенин билдирген.

"Мен бүгүнкү күнгө чейин Ташиев мырза менен тааныш эмесмин, биз жакын арада отуруп сүйлөшөбүз деп ойлойм. Эл арасында "эки достун ортосунда бийлик талашкандай жагдайлар болуп жатат" деген ойлор жаралып жатыптыр. Мен ойлойм бул элдин ою. Жогоруда айткандай, Ташиев мырза менен тааныш эмесмин, ал эми президент менен сүйлөшкөндө мындай талашуу бар экенин сезген жокмун.

УКМКга кээ бир жерден кеңеш берүүгө даярмын. Анткени кээ бир нерселер балким башкача болуш керек эле. Мисалы, УКМКнын медиага чыкканы боюнча айтсам, бул ведомство болгондон кийин тынч, жабык болушу керек", - деп билдирген ал.