"Орус тилинде жооп бергени үчүн чапкан". Окуя боюнча Орусиянын Кыргыз өлкөсүндөгү элчиси үн катты

Буга чейин социалдык тармактарда Бишкектеги соода борбордун биринде эркек киши сатуучу кызды кыргыз тилинде эмес, орус тилинде жооп бергени үчүн чаап жибергени кабарланган. Бул окуя боюнча Орусиянын Кыргыз өлкөсүндөгү элчиси Николай Удовиченко социалдык тармактагы баракчасы аркылуу оюн билдиргенин жергиликтүү басылмалар жазып чыкты.

"Тынчтыкты жана улуттар аралык ынтымакты сактоого салым кошпогон, анын ичинде улуттук кастыкка негизделген агрессивдүү аракеттерди айыптабай коё албайбыз", - деп жазган ал өз билдирүүсүндө.

Ошондой эле ал кыргыз бийлигине "окуяга адекваттуу баа берүү боюнча" кайрыларын кошумчалаган.

Эске салсак, Бишкекте балдар паркында сатуучу кызды калькулятор менен башка чаап жиберген видео тараган. Октябрь райондук милициясынан билдиргендей, окуя 2-август күнү Горький жана 7-Апрель көчөлөрүнүн кесилишиндеги соода борборунда болгон. Арыз жазган кыздын айтымында, ал күнү бейтааныш эркек киши мас болуп алып, аны менен урушуп, сөгүнгөн. Чатакташып жатканда калькулятор менен башка чаап салган.