Өсүмдүк майы менен кумшекердин баасы төмөндөдү. Монополияга каршы жөнгө салуу агенттиги бааларды көзөмөлдөөнү улантууда

Бүгүнкү күндө өсүмдүк майына жана кумшекерге болгон баа төмөндөдү. Бул тууралуу Монополияга каршы жөнгө салуу мамлекеттик агенттик тарабынан кабарланды.

Аталган мекеменин маалыматына ылайык, Бишкектеги "Азиз" базарында социалдык маанилүү азыктардын баасына мониторинг жүргүзүлүп, соодагерлерге түшүндүрүү иштери жүргүзүлгөн.

"Монополияга каршы жөнгө салуу мамлекеттик агенттиктин Бишкек шаары жана Чүй облусу боюнча башкармалыгынын кызматкерлери 6-августта кумшекер жана өсүмдүк майынын баасынын негизсиз өсүшүнө жол бербөө үчүн "Азиз" дүң базарында түшүндүрүү иштерин жүргүзүштү.

Аталган базарда "Лучезарное" өсүмдүк майынын 5 литри 780 сомдон сатылса, бүгүнкү күндө анын баасы 5 литрине 650 сом, майдын литри 120 сомдон 140 сомго чейин сатылууда. Кумшекердин 1 килограммы 57 сомдон 59 сомго чейин сатылууда", - дешти мекемеден.