"Эгерде кимдир-бирөөнүн сезимине, намысына шек кетсе, анда кечирип коюңуздар". Аслан Сартбаев чуулгандуу постунан кийин кайрылуу жасады

Бүгүн, 7-августта Улуттук коопсуздук мамлекеттик комитетинен "расалык, этникалык, улуттук, диний же аймактар аралык кастыкты козутуу (жек көрүү)" беренеси менен "Азия Ньюс" гезитинин башкы редактору Аслан Сартбаевге карата сотко чейинки өндүрүш иши башталганын кабарлашты. Аталган мекемеден Сартбаев интернетке жарыялаган материалда аймактар аралык кастыкты козутуунун белгилери бар экендиги боюнча тиешелүү экспертиза дайындалганын кошумчалашкан. Кийинчерээк редактор кармалышы боюнча социалдык тармакка билдирүү калтырды.

"Мен жалпы оштуктарга сөз тийгизип, акаарат келтирген жокмун. Бул факты! Болгону Бишкек мэрлигине келген Таалайбек Сарыбашовго карата суроо берип, сын-пикиримди ортого салдым. Адам баласында сөз, ой эркиндиги болушу керек. Дароо эле кылмыш ишин козгоп, камакка алууга басым кылышканы абсурд! Эгерде кимдир-бирөөнүн сезимине, намысына шек кетсе, анда кечирип коюңуздар. Биз бир улутпуз, ынтымакта бололу! Мага жана үй-бүлөмө коркунуч келтиргендерге сабыр тилейм!
А баса, мен "Азия Ньюс" гезитинен Ташиевдин, Сарыбашовдун ишмердиктерин сындап келгем, ошол жагынан өч алууга баратышса жигитчиликке жатпай калат!", - деп айтылат билдирүүдө.

Кечээ, 6-августта социалдык тармакта Бишкек шаарынын мэринин милдетин аткаруучу Таалайбек Сарыбашовго карата "Бул итибайдын "ошский ромашкалары" кимге керек? Ушуну кантип чыдап угуп отурушат" деген постун жазган. Көпчүлүк интернет колдонуучулар муну трайбализм катары мүнөздөгөн, ал эми калаа башчысынын кеңешчиси талкуу жараткан пост боюнча УКМК сөзсүз түрдө чара көрүшү керектигин билдирген.