Ошто аэропорттун кире беришине мыйзамсыз орнотулган шлагбаум алып салынды

Ош шаарынын аэропортунун кире беришиндеги акы төлөнүүчү шлагбаум алып салынды. Бул тууралуу Башкы прокуратуранын басма сөз кызматынан билдиришти.

Маалыматка ылайык, 2017-жылы “Ош-Аэропорт” авто жолунун бир бөлүгү (165 метр), коопсуздукту сактоо жана көрктөндүрүү үчүн “Манас” эл аралык аэропортуна берилген.

“Манас” эл аралык аэропорту ачык акционердик коому мыйзамды жана жолду үчүнчү тарапка берүүгө тыюу салган эки тараптуу келишимди бузуп, “Т.Г” жоопкерчилиги чектелген коомуна пайдаланууга берип салган. Ал эми аталган коом болсо, аэропорттун кире беришине мыйзамсыз түрдө шлагбаум орнотуп, аэропортко кирген ар бир автоунаадан акы алып турган.

2-июнда Ош шаардык прокуратурасы тарабынан ченемдик укуктук актылардын бузулушун четтетүү жөнүндө тиешелүү мамлекеттик органдарга талап келтирилип, “Ош-Аэропорт” автожолуна мыйзамсыз орнотулган шлагбаум алып салынды.

Мындан сырткары, прокурордук текшерүүнүн жүрүшүндө аталган юридикалык тараптардын ортосунда түзүлгөн келишимге жолдун пайдалануудагы бөлүгүн субарендага берүү боюнча жалган маалыматтарды киргизүү фактысы аныкталган. Материалдар Жазык кодексинин 320-беренеси (кызмат абалынан кыянаттык менен пайдалануу) жана 233-беренеси (Коммерциялык же башка уюмда ыйгарым укуктарын кыянаттык менен пайдалануу) менен Кылмыштардын жана жоруктардын бирдиктүү реестрине катталып, сотко чейинки өндүрүш иши башталды", - деп айтылат маалыматта.