"Баасы 1 жарым миллион рубль". 60 бодо малды мыйзамсыз алып кирип келе жаткандар кармалды

Кыргыз-казак чек арасынан Кыргыз өлкөсүнө 60 баш бодо малды мыйзамсыз алып кирүү аракетине бөгөт коюлду. Бул тууралуу Мамлекеттик салык кызматынын маалымат кызматынан билдиришти.

Маалыматка ылайык, тиешелүү документтери жок үч жүк ташуучу унаа кармалган. Анда 150 миң рубль турган 20 даана авто дөңгөлөк жана суммасы 1 миллион 500 миң рубль турган 60 баш ири мүйүздүү мал болгон.

"Мындан сырткары 6 тонна коон жүктөлгөн 2 жүк ташуучу автоунаа кармалган. Текшерүү учурунда импорттоочуларда товарды ташып келүүгө салыктык каттоо жөнүндө салык органынан маалымкаты жок болуп чыкты. Кармалган жүктөр мыйзамга ылайык андан аркы чараларды көрүү үчүн мобилдик топко өткөрүлүп берилди", - деп жазылат маалыматта.

Салык кызматынан 2021-жылдын жети айында Евразия экономикалык биримдигине мүчө мамлекеттерден мыйзамсыз товар ташылып келинген 1083 учур катталганын кошумчалашты.