UFC: Жеңиш менен Бишкекке кайтып келген мушкер Рафаэль Физиевди эч ким тосуп алган эмес (видео)

8-август күнү "UFC 265" турниринде америкалык мушкер Бобби Гринди жеңип, катары менен төртүнчү жеңишин камсыздаган мекендешибиз Рафаель Физиев Кыргыз өлкөсүнө кайтып келди. Бул тууралуу интернет колдонуучуларынын бири социалдык тармак аркылуу билдирип, мушкердин мекенине келгендеги видеосун жарыялады.

Андагы маалыматка караганда, белгилүү мушкерди аэропорттон туугандары менен достору гана тосуп алган.

"Биздин чемпионду аэропорттон үй-бүлөсү гана тосуп алды. Болгону жубайы, балдары жана туугандары... Ал дүйнөлүк деңгээлде биздин желегибиздин астында чыгып жүрөт. Аны эч ким кандайдыр бир сыйлык менен сыйлап коёюн деген да жок. Ал эми Хабибди Кудайдай кылып урмат-сый менен президент баш болуп, бардык өлкө жарандары тосуп алышкан", - деп калтырган колдонуучулардын бири.

Белгилей кетсек, Рафаэль Физиев Бобби Гринди жеңип, катары менен төртүнчү жеңишине жеткен соң, UFC уюмунун жаңыланган рейтингинде жеңил салмактагы эң мыкты 15 мушкердин катарына кирген. Учурда Дастин Порье, Конор Макгрегор сыяктуу белгилүү мушкерлер орун алган рейтингде мекендешибиз 14-орунда турат.