Баткендеги Интернационал айылына Тажикстан тараптан ок атылды

Бүгүн, 11-августта Баткен облусундагы Интернационал айылына Тажикстан тараптан ок атылды. Бул тууралуу УКМК Чек ара кызматынын коомчулук жана ЖМК менен байланышуу бөлүмүнөн билдиришти.

"Болжол менен саат 15:10до Лейлек районунун Интернационал айылында Тажикстан тараптан ок атылганы угулган. Интернационал айылындагы аймактык оорукананын имаратынын экинчи кабатындагы терезени ок тешип өткөн. Ал жерде 5,45 миллиметр калибриндеги АК-74 автоматынын огу табылган", - деп жазылат билдирүүдө.

Октон жаракат алгандар жана жабыркагандар жок.

Учурда компетенттүү жана укук коргоо органдарынын кызматкерлери окуянын чоо-жайын иликтешүүдө.

Кыргыз өлкөсүнүн жана Тажикстандын чек ара өкүлдөрү телефон аркылуу сүйлөшүүлөрдү жүргүзүшүп, тажик тарап Интернационал айылына чектеш жайгашкан өздүк курамдын курал-жарагын текшерүүдөн өткөрөрүн маалымдаган.

Саат 17:00дө Кыргыз өлкөсүнүн жана Тажикстандын чек ара өкүлдөрүнүн жолугушуусу болуп, анда тажик тарап өткөргөн текшерүүнүн жыйынтыгында Тажикстандын чек арачылары курал колдонушпагандыгын билдиришти. Ошону менен бирге ок кокусунан атылган болушу мүмкүн экендигин Тажикстандын чек ара өкүлү белгилеген. Жолугушуунун катышуучулары ар бир тарап окуянын чоо-жайын өз алдынча иликтөөгө алуу чечимин кабыл алышты.

Учурда Кыргыз-Тажик мамлекеттик чек ара тилкесинде абал туруктуу.