Бишкек мэриясы унааны акысыз токтотсо боло турган жайларга туруп алып, мыйзамсыз акча алып жүргөндөрдү аныктады

Борбор калаада "Мадина" базарынын жанында мыйзамсыз унаа токтотуучу жайды көзөмөлдөгөн жарандар кармалды. Бул тууралуу Бишкек мэриясынын маалымат кызматынан билдиришти.

"Бишкектин унаа токтотуучу жайлары" муниципалдык ишканасынын адистери жасалма унаа токтоткуч адамдарды аныктап жатышат.

Жүргүзүлгөн рейддин жыйынтыгында Менделеев жана 7-Апрель көчөлөрүнүн кесилишинде (Мадина базары) унаа токтотуучу жайдан мыйзамсыз акча алып жүргөн адамдарды табышты. Алардын аракеттеринин мыйзамсыздыгы тууралуу түшүндүрүү иштери жүргүзүлдү, бирок алар ал унаа токтотуучу жайдан кетүүдөн кескин баш тартышты. Адистер Бишкек шаары боюнча инспекторлорун чакырууга аргасыз болушкан.

Унаа токтотуучу жайдын кызматчылары Свердлов райондук ички иштер бөлүмүнө жеткирилген, аларга карата Кыргыз өлкөсүнүн мыйзамдарына ылайык тиешелүү чаралар көрүлөт.

Урматтуу жарандар! "Мадина" базарына кирүү жана чыгуу бекер экенин, эч ким сизден төлөм суроого акысы жок экенин унутпаңыз! Эгерде паркингдин тейлөөчүлөрү атайын жилеттер менен жабдылбаса жана төлөм талону берилбесе, социалдык түйүндөр аркылуу видео жана фото фактылар менен "Бишкектин унаа токтотуучу жайлары" муниципалдык ишканасынын адистерине кайрылыңыздар", - деп жазылат маалыматта.