"13 миңден ашуун өспүрүм бар". Баткенде өспүрүмдөргө карата "көчө баласы" аталышындагы рейд өтүүдө

Баткен облусунда өспүрүмдөрдүн сууга чөгүү фактыларын алдын алуу боюнча коопсуз болгон каналдарга, көлмөлөргө эскертүү баракчалары илинип, түшүндүрүү иштери жүргүзүлүп жатат. Бул тууралуу облустук милициядан билдиришти.

Ага ылайык, Баткен РИИБинин Кара-Бак айылдык милиция бөлүмүнүн кызматкерлери Кара-Бак айыл аймагына караштуу Кара-Бак, Дөбө, Бай-Кара-Бак, ал эми Дара айыл аймагына караштуу Чет-Кызыл, Жаңы-Жер, Чек айылдарынын тургундары менен жолугушуп, кылмыштуулуктун алдын алуу жана болтурбоо максатында түшүндүрүү иштерин жүргүзүүдө.

"2021-жыл ичинде Кара-Бак айылындагы мектеп окуучулары уруу-урууга бөлүнүп, массалык мушташуу боюнча 2 факты катталган. Өспүрүмдөр арасында укук бузуулардын, кылмыштуулуктун алдын алууда милиция кызматкерлери “Көчө баласы” рейдин уюштуруп, түндө өз алдынча жүргөн балдар текшерилүүдө. Кара-Бак айылдык милиция бөлүмү тейлеген аймакта жалпысынан 13 миңден ашуун өспүрүм бар", - деп билдиришти Баткен ОИИБинин басма сөз кызматынан.