Кезектеги аракет. "Ош базарынын" аймагындагы башаламан соода жоюлат

"Ош базарынын" аймагында стихиялуу сооданын жоюлушу көзөмөлгө алынат. Бул тууралуу шаардык мэриянын маалымат кызматынан билдиришти.

Маалыматта жазылгандай, Ленин акимчилигинин жыйындар залында шаардык, райондук кызматтардын башчылары жана райондук МАБ башчыларынын катышуусунда кезектеги пландуу жыйын өткөрүлдү.

"2020-2021-окуу жылынын жыйынтыгы жана 2021-2022 жаңы окуу жылына даярдык иштери жөнүндө райондук билим берүү борборунун отчёттору угулду. Мындан тышкары, "Тазалык" муниципалдык ишканасынын 2021-жылдын биринчи жарымында аткарылган иштер боюнча отчёттору угулду.

Жолугушуунун жыйынтыгында жетекчинин биринчи орун басарына Манка-Жар каналынын сел тосмосунун жээктерин механикалык тазалоо жана бекемдөө иштерин күчөтүлгөн тартипте жүргүзүү, ошондой эле "Ош базарынын" аймагында стихиялуу сооданын жоюлушун көзөмөлгө алуу тапшырылды", - деп жазылат маалыматта.

Ал эми "Тазалык" муниципалдык ишканасынын директорунун орун басарына таштанды контейнерлерин көбөйтүү мүмкүнчүлүгүн жана базарларда катуу тиричилик таштандыларын чыгаруу мөөнөтүн кайра карап чыгуу тапшырылды.