Актёр Азамат Уланов: "Үйлөнүүгө моралдык жактан даяр эмесмин"

Бир нече кинолордо башкы ролдорду жараткан актёр, тамашоучу Азамат Уланов биздин "Рулдагы жылдыз" рубрикабыздын кезектеги коногу болуп, унаасы менен тааныштырып, ал ортодо жеке жашоосу тууралуу дагы айтып берди.

"2 жылдан бери сүйлөшүп жүргөн кызым бар, буюрса, эки жылдан соң үйлөнөм деген пландарым бар. Азыр "качан үйлөнөсүң?" деп сураган атамдын достору көп. "Менин кызымды албайсыңбы?" деп сунуштаган эжелер дагы бар (күлүп). Бир жолу достор менен кафеде отурганбыз, анан бир кыз келип эле "апам номериңди сурап жатат" дейт, "сен сурасаң мейли эле, апаңа эмнеге керек?" десем, мейли деп кетип калган. Бир убакта апасы келиптир, тиги менин кызым деп. Сүйлөшкөн кызым бар десем болбойт. Мындай окуяларга көп учурайм. Азыр үйлөнгөнгө, балким, материалдык жактан даяр болушум мүмкүн, бирок моралдык жактан даяр эмесмин. Үйлөнгөн соң үй-бүлөнү багуу деген бар, дагы бир адамга жооп бересиң, ал дагы чоң жоопкерчилик", - дейт Уланов.