"Унаамды "алтышка" деп коём, сүйлөшкөн кызым кызганбайт" дейт актёр Азамат Уланов

"Унаамды "алтышка" деп коём, сүйлөшкөн кызым кызганбайт" дейт актёр Азамат Уланов. Ал биздин "Рулдагы жылдыз" рубрикабыздын коногу болуп, унаасы тууралуу кеңири маек куруп берди.

"Унаа айдаганды кичине кезимден баштап эле үйрөнгөм. Алгач атамдын бутуна отуруп алып үйрөнгөм. Кийин бара-бара өзүм айдай баштадым. Эң алгачкы унаам Хонда Фит үлгүсүндөгү унаа болчу. Эки жылдай акча чогултуп, унаа алып койгула деп үйдөгүлөргө бергем. "Ата" тасмасы тартылып жатканда, биз шаардын четине 10 күнгө съемкага кеткенбиз. Келсем эле үйдө таекемдер бар экен, сыртта жаңы унаа токтоп турат. Анан бир убакта эле атам ачкычты алып чыгып "бул унаа сеники балам" деди. Аябай сүйүнгөнүм эсимде. Экинчи унаам Тойота Камри 30 болчу, аны эки жыл айдадым. Андан кийин эле ушул Тойота Камри 40 үлгүсүндөгү унааны алдым. "Алтышка" деп эркелетип коём, сүйлөшкөн кызым кызганбайт. Ага сени 50, унаамды 50 пайыз сүйөм деп айтып койгом", - дейт Уланов.