Владивостокто курулушта иштеп жатып каза болгон Кыргыз жаранынын сөөгү мекенине жөнөтүлдү

Орусиянын Владивосток шаарында курулушта иштеп жаткан учурда каза болгон К.Ж. аттуу жарандын сөөгү мекенине жөнөтүлдү. Бул тууралуу Кыргыз өлкөсүнүн Орусиядагы элчилигинен билдиришти.

Маалыматка ылайык, 10-августта иш берүүчү менен сүйлөшүүлөр жүргүзүлүп, натыйжада алар Хабаровск-Москва-Ош каттамында коштоп жүргөн адамдарга 13-августта 4 авиабилет сатып берип, маркумдун эмгек акы картасын тапшырышкан.

"Маркумдун жакындарына жумушта материалдык компенсация жана башка камсыздандыруу төлөмдөрүн төлөө боюнча макулдашуу болду. Элчиликтин Владивосток шаарындагы кеңсеси «Жүк-200дү» Кыргыз Республикасына жөнөтүүгө даярдык көрүү менен байланышкан жол-жоболорду жүргүзүү үчүн Хабаровскдогу жаназа кызматына керектүү документтердин тизмесин даярдап жөнөткөн.

Бүгүнкү күндө элчиликтин Владивостоктогу канцеляриясы маркумдун жакындары жана “Интер-пол” ЖЧКсынын жетекчилиги менен дайыма байланышта экендигин маалымдайбыз. Маркум К.Ж. ушул жылдын 16-июлунда «ИнтерПол» ЖЧК курулуш компаниясына жумушка орношкон", - деп жазылат маалыматта.