Гүлжигит Алыкулов "Кайрат" клубунун курамында 50-оюнун өткөрдү

Казакстандын "Кайрат" футболдук клубунун оюнчусу, мекендешибиз Гүлжигит Алыкулов аталган клубдагы 50-оюнун өткөрдү. Бул тууралуу Кыргыз футбол маалымат агенттиги жарыялады.

Маалыматка ылайык, 12-август күнү алматылык клуб Европа Лигасына үчүнчү жолку тандап алуу оюндарынын алкагында кезектеги беттешин өткөргөн. Армениянын Алашкерт командасына каршы өткөн жооптук оюнда мекендешибиз 112-мүнөттө талаа үстүнө чыккан. Муну менен кыргыз футболчусу Кайраттын формасы менен 50-беттешин өткөрдү.

Тилекке каршы, ал жооптук беттеш 3-2 эсебинде армениялык команданын пайдасына жыйынтыкталган.

Гүлжигит Алыкулов "Кайрат" клубу менен өткөргөн 50 оюндун жыйынтыгында 7 гол киргизип (Казакстан премьер лигасында 5 гол, Казакстан Супер Кубогунда 1 гол, Европа Лигасында 1 гол), 8 жолу голдук пас чыгарып берүүгө жетишкен.

Ошондой эле былтыркы жылы аталган клуб менен Казакстан чемпиондугун жеңип алган.

Эске салсак, Гүлжигит Алыкулов өткөн жылдын январь айында Кайрат клубу менен 2+1 жылдык келишим түзгөн. Ага чейин Беларусь өлкөсүнүн "Неман" клубунда ойноп келген. Ал "Дордой" клубунун тарбиялануучусу.