Өзгөчө кырдаалдар министрлигинин куткаруучулар тобу эл аралык мелдешке катышат

Өзгөчө кырдаалдар министрлигинин куткаруучулары жакынкы арада Казакстан Республикасында өтө турган эл аралык мелдешке даярдык көрүүдө. Бул тууралуу аталган министрликтин басма сөз кызматынан билдиришти.

Маалыматка ылайык, учурда куткаруучуларды даярдоочу мамлекеттик борборунда ӨКМнын облустук башкармалыктарынан куткаруучулар тандалып келген. Алар алдыдагы 1 айлык убакытта аталган борбордо билимдерин жогорулатуу үчүн атайын окуудан өтүшөт. Ал убакыт аралыгында куткаруунун бардык түрүн окуп үйрөнүшөт.

Ал эми эл аралык мелдешке жалпысынан 8 куткаруучу тандалып алынары айтылган. Мындай иш-чаралар куткаруучулардын эл аралык аренада профессионалдуулугун далилдөө үчүн өткөрүлүп жатканы маалым болду.

Эске салсак, ӨКМнын куткаруучулар тобу буга чейин дагы КАЗПАСС эл аралык мелдештерине катышып, алдыңкы орундарды багындырып келген.