"Жарандык алуу үчүн эң аз дегенде 10 миң доллар сурашат" дейт митингге чыккан оогандык жаран

Бүгүн, 19-августта Бишкек шаарындагы АКШнын элчилигинин алдына ооганстандыктар митингге чыгышты.

"Бизге эч кандай мүмкүнчүлүк түзүлбөй келет. Мисалы, балдарды оңой менен мектепке киргизе албайбыз. Бир баланы окутуу үчүн 10 миң сомго чейин акча кетет. Мына эми окуу башталганы турат. А менин эч кандай иштеген жумушум жок. Акча да жок. Кимге барам мага акча берчи деп.

Жумушка кирели десек уруксат жок эч ким жумуш бербейт. Себеби жумушка уруксат кагаз жок. Жарандык ала элекпиз ушул күнгө чейин. Эптеп бир жумушка кирсең 100 сомдук айлык 50 сом болуп берилет, 500 сом 250 сом болуп келет. Ал эмес курулушта дагы жумушка уруксат кагазын сурашат.
Анын үстүнө көбү батирде турушат. Анын акысын төлөгөнгө да акча табуу кыйын", - деп билдирди атын атагысы келбеген Ооган жараны.

Ошондой эле "жарандык алуу үчүн эң аз дегенде 10 миң доллар сурашат. Бул бери жагы гана. Башка өлкөлөрдө 6 жылда жарандык берет. А мен 16 жылдан бери Кыргыз өлкөсүндө жашайм. Бул жактан үйлөнгөм. Бирок дагы деле ала албай келем", - дейт.

Анын айтымында, 2 жарым күндөн бери ушинтип нааразычылык акциясын өткөрүп жатышат. Кечээ Бириккен улуттар уюмунун имаратында болгон митингде эч ким чыгып жооп берген эмес. Бүгүн дагы таңдан бери турушат. Бирок дагы деле жооп жок.