Германия Кыргыз өлкөсүнө 110 миң доза вакцина бермей болду

Германия өкмөтү COVAX механизминин алкагында Кыргыз өлкөсүнө 110 миң доза вакцина берет. Бул тууралуу Тышкы иштер министрлигинен кабарлашып, учурда логистикалык маселелер кошумча талкууланарын белгилешти.

Маалым болгондой, тышкы иштер министр Руслан Казакбаев Ишеним грамотасынын көчүрмөсүн тапшырууга байланыштуу Германиянын Кыргыз жергесиндеги элчиси болуп дайындалган Габриэла Геллилди кабыл алды.

Жолугушуунун башында Казакбаев Габриэла Геллилди бул кызматка дайындалышы менен куттуктап, жооптуу кызматында мындан аркы ийгиликтерди каалады.

"Тараптар 2022-жылы өлкөлөр ортосунда дипломатиялык мамилелердин түзүлгөндүгүнүн 30 жылдыгын белгилөөгө даярдык көрүүгө, анын ичинде эң жогорку жана жогорку деңгээлде өз ара сапарларды уюштурууга өзгөчө көңүл бурушту. Эки өлкөнүн ортосундагы маданий жана билим берүү тармагындагы кызматташтыкты бекемдөө жана кеңейтүү максатында Бишкекте француз-герман маданият институтун ачуу маселеси өзүнчө талкууланды.

Жолугушуунун аягында министр Руслан Казакбаев кыргыз тараптын эки тараптуу мамилелерди бекемдөөгө даярдыгын билдирди жана элчини Кыргыз Республикасынын эгемендүүлүгүнүн 30 жылдыгына карата 30-31-августуна пландаштырылган майрамдык иш-чараларга катышууга чакырды", - деп айтылат билдирүүдө.