"Мухтар Шаханов аганы даректүү тасмага тартуу үчүн чакырдык" дейт режиссёр Руслан Машрапов

Казак элинин жазуучусу, акыны Мухтар Шаханов Кыргыз өлкөсүнө даректүү тасмага тартылүү үчүн келди. Бул тууралуу режиссёр Руслан Машраповго байланышканыбызда белгилүү болду.

Анын айтымына караганда, Эгемендүүлүктүн 30 жылдыгына карата кыргыз-казак достугун бекемдөө максатында даректүү тасма тартылат.

"Мухтар аганы даректүү тасмага тартуу үчүн чакырдык. Буга чейин (июнь айында) эки мамлекеттин ортосундагы маданият тармагында тажрыйба алмашуу алкагында кыргыз-казак достугун бекемдей турган даректүү тасма тартуу боюнча чечим кабыл алынган. Ошол эки элдин достугунда залкар жазуучу Чыңгыз Айтматов менен Мухтар Шахановдун достугун алганбыз. Тасманын тартуу иштерин уюштуруу үчүн өлкөгө 3 күнгө Мухтар Шаханов аганы алып келдик. Бул жакта жазуучу маданий иш-чараларга катышат. Ошондой эле чыгармачылык кечесин өткөрүүнү пландап жатабыз", - деди Машрапов.

Буга чейин казак элинин жазуучусу Мухтар Шаханов Кыргыз өлкөсүнө келгени кабарланган.