“Шамбала” тасмасы Москвада өтө турган кинофестивалга катышат

Белгилүү кинорежиссёр Артыкбай Сүйүндүковдун “Шамбала” тасмасы эл аралык “Будем жить” (Жашайбыз) аттуу X Москва кинофестивалынын башкы сынагына тандалып алынды. Бул тууралуу маалымат кинофорумдун расмий сайтына жарыяланды.

Кинофестиваль Москва шаарынын майрамы менен орус киносунун күнүнө карата уюштурулган. Иш-чара 23-августта башталып 3-сентябрга чейин уланат.

“Шамбала” тасмасынын көрсөтүлүшү 29-августта саат 20:00дө Москва кино үйүнүн чоң залында өтөт.

Белгилей кетсек, фестиваль 2011-жылдан бери Москва шаарында болуп келет. Алгач жаш режиссёрлордун чыгармаларынын көргөзмөсү болсо, ал эми 2016-жылдан тартып анимациялык жана толук метраждуу тасмалардын сынагы катары жыл сайын өткөрүлүп келет. 2021-жылы фестиваль эл аралык статуска ээ болгон.

Эске салсак, Артыкбай Сүйүндүковдун “Шамбала” тасмасы белгилүү жазуучу Чыңгыз Айтматовдун “Ак кеме” повестинин негизинде тартылган. Ал буга чейин КМШ чөлкөмүндөгү эң мыкты тасма аталып, Орусиянын “Ника” киносыйлыгын жеңип алган.