Футбол: Киллиан Мбаппе "ПСЖ" клубунун оюнчулары менен коштошуп, аларга "Реал Мадридге" өтөрүн айтканы айтылууда

Франциянын "ПСЖ" футболдук клубунун чабуулчусу Киллиан Мбаппе "Реал Мадрид" клубуна өтүшү мүмкүн. Бул тууралуу чет элдик спорттук басылмалар өздүк булактарына таянуу менен жазышты.

Маалыматка ылайык, Мбаппе "ПСЖ" клубунун оюнчулары менен коштошкон. Чабуулчунун трансфери эки күндүн ичинде расмий түрдө берилет деп болжолдонууда. Мындан тышкары, Испанияда белгилүү болгон "Marca" спорттук басылмасы "Реал Мадрид" менен "ПСЖ" клубдары трансфер боюнча макулдашканын жазды.

Ошол эле учурда бир катар басылмалар "Реал Мадрид" Мбаппе үчүн "ПСЖ" клубуна 170 миллион евро сунуштаганын жазды. Буга чейин "Реал" Париж клубуна футболчу үчүн 160 миллион евро сунуштаган, бирок "ПСЖ" клубу бул сунушту четке каккан.