Эгемендүүлүк майрамында Бишкекте коопсуздукту 2 миңдей милиция кызматкери камсыздайт

Бишкекте Эгемендүүлүктүн 30 жылдыгын белгилөөдө 2 миңдей милиция кызматкери коопсуздукту камсыз кылат. Маалыматты Бишкек ШИИББинин басма сөз кызматынан кабарлашып, башкармалыктын жетекчиси Азамат Ногойбаев өздүк курамдын арасында түшүндүрүү иштерин жүргүзгөнүн белгиледи.

Белгилүү болгондой, Азамат Ногойбаев Эгемендүүлүк күнүндө салтанаттуу иш-чаралар учурунда коопсуздукту жогорку деңгээлде аткарууну тапшырды.

"Эгемендүүлүк күнүндө Бишкек шаарынын аймагында 2 миңге жакын милиция кызматкери күчөтүлгөн тартипте кызмат өтөйт. Коронавирустун жайылышына жол бербөө үчүн милиция кызматкерлери жарандарды санитардык-эпидемиологиялык эрежелерди да сактоого чакырат.

Ал эми Азамат Ногойбаев кызматкерлерге сак болууну, сылык болууну, коомдук тартипти көзөмөлдөөнү, мыйзамды жана тартипти бузбоону тапшырды. Ошондой эле милиция кызматкерлери жарандардын жана борбордун конокторунун жеке мүлкүн коргоого чоң көңүл бурушу керектигин баса белгиледи", - дешти мекемеден.

Бишкек ШИИББи жарандардан милиция кызматкерлеринин коопсуздук чараларына түшүнүү менен мамиле кылууну суранат.