ЭЛДИК КАБАРга жооп: Кызыл-Кыя шаарынын тургуну аймактык милициянын ишине нааразы болгону боюнча тийиштүү мекемеден жооп беришти

SUPER.KG порталынын "ЭЛДИК КАБАР" бөлүмүнө Баткен облусунун Кызыл-Кыя шаарынын тургуну аймактык милициянын ишине нааразы экендигин айтып кайрылган. Анда ал кыш куюп берем деген адам андан 15 миң сом аванс алып, ушул күнгө чейин кыш алып келбегенин, Кызыл-Кыя шаардык ички иштер бөлүмүнө кайрылса арызын албай, ал эми аймактык милиция телефонго жооп бербей жаткандыгын айткан.

Аталган маселе боюнча Баткен облустук ички иштер башкармалыгына байланышканыбызда төмөнкүлөрдү билдиришти.

"Кызыл-Кыя шаарынын 31 жаштагы тургуну бүгүн, 27-август күнү Кызыл-Кыя ШИИБинде Кылмыштардын жана жоруктардын бирдиктүү реестрине "алдамчылык" фактысы менен катталды. Арыздануучу аймактык тескөөчүгө СМС-билдирүү жазган экен. Ал күнү аймактык тескөөчү нөөмөттөн чыгып, СМСин кеч окуптур. Ал эми арыздануучу бөлүмгө келип кайрылган эмес", - дешти мекемеден.