"Эпилепсиясы кармаган". Тамчы - Москва аба каттамы менен бара жаткан Кыргыз жараны каза болду

Тамчы - Москва аба каттамы менен сапарда бара жаткан жүргүнчүлөрдүн бири өзүн жаман сезип, учак Новгород аймагына шашылыш түрдө конгон. Бирок аталган жаранды сактап калуу мүмкүн болгон эмес. Маалыматты SUPER.KG порталына "Манас" эл аралык аэропортунун басма сөз кызматынан тастыкташты.

Маалыматка караганда, окуя 29-август күнү болгон. Каза болгон адам Кыргыз жараны, ал болжол менен 50-51 жашта.

"Аталган Кыргыз жараны туугандары менен бирге Москвага учуп бара жаткан", - дешти аэропорттон.

Ал эми орус басылмаларынын маалыматына караганда, "Аэрофлот" авиакомпаниясына таандык учактын командири Новгород аймагында учуп бараткан маалда учактын бортунда эпилепсиясы бар адам бар экенин айтып, шашылыш конууга уруксат берүүнү суранган.

"20 мүнөт өткөндөн кийин учак конгон, аны жеринде "Тез жардам" кызматы кабыл алган. Мындай ыкчам реакцияга карабастан, дарыгерлер анын каза болгонун аныкташкан", - деп жазылат маалыматта.