Владимир Путин кыргыз элине куттуктоо телеграммасын жөнөттү

Орусия Федерациясынын президенти Владимир Путин президент Садыр Жапаровду жана кыргыз элин өлкөнүн көз карандысыздыгынын 30 жылдыгы менен куттуктады. Владимир Путиндин куттуктоосу президенттик апараттын сайтына жарыяланды.

"Кыргыз Республикасынын эгемендүүлүгүнүн жарыяланышынын 30 жылдыгына байланыштуу чын дилимден куттуктоомду кабыл алыңыз. Биздин мамлекеттер ортосундагы мамиле стратегиялык өнөктөштүк жана союздаштык деңгээлде өнүгүүдө. Маңыздуу саясий диалог, ар кыл багыттагы конструктивдүү кызматташтык, ошондой эле ЕАЭБ, ЖККУ жана ШКУ алкагындагы натыйжалуу өз ара аракеттенүү жолго коюлган. Бул биздин боордош элдин кызыкчылыктарына толук жооп берип, Евразия мейкиндигинде тынчтык, коопсуздук жана стабилдүүлүктү камсыздоо нугунда жүрүүдө", - деп айтылат куттуктоо телеграммасында.

Владимир Путин Садыр Жапаровго бекем ден соолук, ийгилик, ал эми кыргыз элине гүлдөп-өнүгүү каалады.