Ошто өткөн көк бөрү оюнундагы сыйлыктар боюнча нааразычылык тууралуу облустун өкүлчүлүгү үн катты

Бүгүн, 31-августта Ош облусундагы Төлөйкөн айылындагы ипподромдо көк бөрү боюнча түштүк аймагындагы командалар арасында мелдеш өткөрүлдү. Президенттин Ош облусундагы ыйгарым укуктуу өкүлчүлүгү Ошто өткөн көк бөрү оюнундагы сыйлыктар боюнча нааразычылыктар тууралуу билдирүү таратышты.

"Президенттин Ош облусундагы ыйгарым укуктуу өкүлүнүн резервдик фондунан 70 миң сом каражат бөлүп, Көк бөрү федерациясынын Ош облусундагы өкүлчүлүгүнө тапшырылган.

Өкүлчүлүк тарабынан бөлүнгөн каражатты жеңүүчүлөргө бөлүп берүү Көк бөрү федерациясына милдеттендирилген. Бүгүн оюндан кийин 1-орунду ээлеген Кара-Кулжа жана 2-орунду ээлеген Өзгөн районунун командасынын мүчөлөрү байгеде айтылган суммадан тапшырылган сумма аз экенин айтып, Ош облусунун башчысы Зиядин Жамалдиновго кайрылышкан. Зиядин Жамалдинов нааразы болгон улакчыларды жана Көк бөрү федерациясынын облустагы өкүлдөрү менен жолукту.

Жыйынтыгында Көк бөрү федерациясынын Оштогу өкүлчүлүгүнүн уюштуруу иштеринде кемчиликтер кеткени аныкталды. Аталган федерациянын облустагы өкүлү эртең улакчыларга байгеде айтылган сумманы толугу менен тапшырат", - деп жазылат маалыматта.