Анкара шаарында Манастын айкели тургузулду

31-августта Кыргыз Республикасынын эгемендүүлүгүнүн 30 жылдыгына карата Түркиянын Анкара шаарында айкөл Манас баатырдын эстелиги тургузулду. Бул тууралуу түрк басылмалары жазып чыгышты.

Маалыматка ылайык, Манастын айкели Кечиөрен районунун борбордук майданында тургузулган.

Анын ачылышына Түркия президентинин администрациясынын өкүлдөрү, Кечиөрен районунун мэри, Түркиянын Тышкы иштер министрлигинин өкүлдөрү жана коноктор катышкан.

Кыргыздын Түркиядагы элчиси Кубанычбек Өмүралиев Манас айкелинин тургузулушу боордош эки элдин түбөлүк достугунун символу болуп каларына ишенерин билдирген.

"Түркия Кыргыз өлкөсүнүн көз карандысыздыгын тааныган биринчи өлкө. Ал эми бул аракеттер эки өлкөнүн ортосундагы кызматташтыкты, биримдикти жана ынтымакты жаңы баскычка көтөрөт. Манас айкелин тургузууга салым кошкон бардык Түрк жана Кыргыз жарандарына, демилгени колдогон өлкө башчылары Режеп Тайип Эрдоган жана Садыр Жапаровго өз ыраазычылыгымды билдирем", - дейт ал.

Ал эми Кечиөрен муниципалитетинин мэри Тургут Алтынок "Манас" эпосу адамзаттык баалуулуктарды камтыган дүйнөдөгү эң узун эпос экендигин белгилеп, элди биримдикке, бир туугандыкка чакырган.

Белгилей кетсек, аталган айкелдин автору таланттуу скульптор Саадабек Ажиев.