Эмне үчүн СССР урагандан кийин завод-фабрикалар жок болуп кеткен? Аскар Акаевдин жообу

Орусиялык блогер Илья Варламов Кыргыз өлкөсү тууралуу "СССРсиз 30 жыл" аталышындагы видео тасмасын жарыялады. 2 саатка созулган тасмада ал Кыргыз мамлекети Советтер союзунун курамынан чыгып, көз карандысыздык алгандан берки 30 жыл аралыгындагы өлкөдө болгон өзгөрүүлөр тууралуу баяндаган.

Блогер СССРдин мезгилинде курулган, бирок көз карандысыздык алган соң ишин токтотуп, имараттары кыйраган завод-фабрикаларга кеңири токтолгон. Алардын ичинен бир кезде чөп түктөөчү техникаларды чыгарып, башка мамлекеттерге таратып турган Бишкектеги Фрунзе атындагы айыл чарба машиналарын куруу заводунун учурдагы бузулган абалын көрсөткөн.

Ошондой эле ал заводдордун бардыгы туңгуч президент Аскар Акаевдин убагында иштен чыкканын баса белгилеп, мунун себебин билүү үчүн Аскар Акаевге суроо узаткан.

Ал эми Аскар Акаев буга "1990-1991-жылдары биздин бардык өнөр-жай ишканаларыбыз ишин токтотту. Себеби аларга эч кандай буйрутма келбей калды. Биздин компаниялар өндүргөн продукцияларга эч ким муктаж болбой калган. Буйрутма түшпөсө айлык-акы болбойт. Ал эми айлык жок болсо алардын кимге кереги бар? Эмне кылмакпыз? Кантип сактап калат элек? Аларды эч ким сактап кала алган жок.

Андай өнөр-жайлар жеке эле бизде эмес башкаларда да кыйрады. Орусияда, Украинада жана башка бардык жерде. Эч ким аларды сактап кала албады", - деп жооп берген.