Суучул Владислав Шулико: "Кыргыз өлкөсүнөн эч жакка кетпейм"

Буга чейин 21 жаштагы суучул Владислав Шулико Ысык-Көлдү узунунан алты күн ичинде сүзүп өтүп, рекорд койгон.

Бүгүн, 1-сентябрь күнү аталган иш-чаранын жыйынтыгын чыгаруу максатында маалымат жыйын болуп өттү. Анда суучул Шуликого жалпыга маалымдоо каражаттарынын өкүлдөрү тарабынан кийинки кадамдары, максаттары тууралуу суроолор берилди.

"Мен көлдү узунунан сүзүп өтөм дегенде алгач эч ким ишенген эмес. Бардыгы бул мүмкүн эместигин айткан. Бирок кыялдар орундалат. Менин кийинки максатым Азия чемпиондугуна катышуу", - деп билдирди ал.

Мындан сырткары Шуликонун келечектеги жубайы Орусиянын жараны экенин айтып, Кыргыз өлкөсүнөн кетүү оюңуз жокпу деген дагы суроолор берилди. "Мен Кыргыз өлкөсүнөн эч жакка кетпейм" деп жооп берди спортчу.

Спортчунун 22-августта Караколдон башталган марафону 27-августта Балыкчыда ийгиликтүү жыйынтыкталган. Шулико бир катар эл аралык таймаштарга катышып, байгелүү орундарды ээлеп келген.