"Эгемендүүлүк күнүнө туура келип калды". Коргоо министри Жамааттык коопсуздук келишим уюмунун катчысы менен жолукту

Кыргыз өлкөсүнүн коргоо министри Жамааттык коопсуздук келишим уюмунун башкы катчысы менен жолугушту. Бул тууралуу аталган министрликтин маалымат кызматынан билдиришти.

Маалыматка караганда, 1-сентябрда коргоо министри Таалайбек Өмүралиев Жамааттык коопсуздук келишим уюмунун башкы катчысы Станислав Зась менен жолукту.

Өмүралиев өз сөзүндө бул жолугушуу Кыргыз өлкөсүнүн Эгемендигинин 30 жылдык датасына туура келип отурганын белгилеп, мамлекетке колдоо көрсөтүп келе жаткандыгына ыраазычылык билдирди.

"Ошондой эле Коргоо ведомствосунун башчысы ЖККУнун Жамааттык коопсуздук кеңешинин сессиясына жана анын уставдык органдарынын кезектеги отурумуна киргизилүүчү мамлекеттер арасындагы документтердин долбоорлорунун процедураларын өз убагында аяктоого Коргоо министрлиги даяр экендигин белгиледи", - деп жазылат маалыматта.