Тышкы иштер министринин орун басары: "Пакистандык туристтердин келиши менен өлкөдө эпидемиологиялык кырдаал оорлошкон эмес"

Бүгүн, 7-сентябрда Жогорку Кеңештин комитет жыйынында депутат Бейшеналы Нурдинов Пакистандан келген туристтер обсервацияга жатпай, кенен өлкөнү кыдырып жүргөнүн айтты.

"Пакистандан келген туристтер обсервацияга жатыш керек да. Эмнеге башка жактагылар учуп келсе, Кыргыз өлкөсүндө кенен басып жүрүшү керек? Буга ким жооп берет?" - деп сурады депутат.

Тышкы иштер министринин орун басары Айбек Артыкбаев Пакистандан келген туристтер электрондук виза алышканын билдирди. "Анкетаны толтургандан кийин 5 күндүн ичинде УКМК текшерип уруксат беришет. УКМКнын уруксатынан кийин Тышкы иштер министрлигинин Консулдук кызмат департаменти тастыктама берет. 1-январдан тарта 9 миң 917 адамга виза берилиптир. Алар каттоого алынбайт. Виза бир айга берилгенде Чек ара кызматы өлкөгө кирип-чыгарда мөөр басат. Туристтик компаниялар өздөрү уюштуруп, аларды аэропорттон тосуп алып, автобус менен мейманканага жайгаштырат. Аларды коштоп жүрөт. Ушул маселе боюнча коомчулуктун коопсуздугун карап, виза берүүнү токтотконбуз. Пакистандык, индиялыктарга виза берүү токтотулган. Алардын келиши менен өлкөдө эпидемиологиялык кырдаал оорлошкон эмес, ошондой эле туристтер катышкан чыр-чатак катталган эмес", - дейт ал.