Индиялык ишкерлер Кыргыз өлкөсүнөн бал, кургатылган жемиштердин импорттолушуна кызыкдар

Индиялык ишкерлер Кыргыз өлкөсүнүн айыл чарба продукцияларынын импорттолушуна кызыкдар. Бул тууралуу Тышкы иштер министрлигинин алтынчы саясий департаментинин директорунун орун басары Рахман Аданов Индиянын Экономикалык соода уюмунун (IETO) президенти Асиф Икбал баш болгон Индиянын ишкер чөйрөсүнүн өкүлдөрү менен жолугушуусунда маалым болду.

"Жолугушуунун жүрүшүндө Рахман Аданов экономика чөйрөсүндөгү мыйзамдарга киргизилген бир катар өзгөртүүлөр жана инновациялар тууралуу айтты. Сүйлөшүүнүн жүрүшүндө кыргыз экспортун, атап айтканда Индиянын рыногуна жеткириле турган органикалык айыл чарба продукциясы боюнча маселелер көтөрүлдү. Сүйлөшүүнүн дагы бир өзүнчө темасы Кыргыз жергесиндеги туризмди өнүктүрүү маселеси болду.

IETO'нун президенти Асиф Икбал маалымдагандай, индиялык делегациянын өкүлдөрүнө төмөнкүлөр өзгөчө мааниге ээ: жездин жана органикалык айыл чарба продукцияларынын (бал, кургатылган жемиштер жана башка) импорту, чакан мейманканалардын курулушу, алкоголдук ичимдиктердин сатылышы. Ал билим берүү тармагындагы кызматташууга болгон кызыкчылыгын да билдирди", - деп айтылат маалыматта.

Бул иш сапардын алкагында индиялык ишкерлер Кыргыз өлкөсүнүн мамлекеттик органдарынын жана жеке структураларынын өкүлдөрү менен да жолугушууларды өткөрүшөт.