Жанар Акаев: "КТРК менен депутаттар окшош эле, кайсы бийлик келсе иштеше берет"

Бүгүн, 8-сентябрда Жогорку Кеңештин жыйынында КТРКнын Байкоочу кеңешинин отчёту каралып жатат. Анда депутат Жанар Акаев КТРКны кайрадан мамлекеттик телеканал кылуу демилгеси болуп жатканын укканын билдирди.

"2010-жылдан баштап өлкө парламенттик башкарууга багыт алган, КТРК дагы коомдук телеканал болгон. Азыр бийлик алмашып, президенттик башкаруу өлкөсүнө айландык. КТРКны кайрадан мамлекеттик телеканал кылып, анын жетекчисин президент өзү дайындай тургандай демилге болуп жатканын уктум. Ошондой демилге барбы?", - деп сурады депутат.

Байкоочу кеңештин төрагасы Кубат Болотканов мындай маалыматы жоктугун айтты.

"Азыр дүйнө жүзүндө журналистикада атаандаштык жаралды. Элде арман болсо КТРКга кайрылбайт. Ал тургай депутаттарга да кайрылбайт. КТРК менен депутаттар окшош эле, кайсы бийлик келсе, иштеше берет. Ал жактан силерге доомат коё албайбыз. Жарандык журналистика салттуу журналистиканы жеңип бара жатат", - деди ал.