Ысык-Көлдү сүзүп өткөн Владислав Шуликого Садыр Жапаров 500 миң сом тапшырды

Президент Садыр Жапаров бүгүн, 8-сентябрда суучул, спорт чебери Владислав Шулико менен жолугуп, 500 миң сом тапшырды. Бул тууралуу президенттик аппараттын басма сөз кызматынан билдиришти.

Маалыматка ылайык, Садыр Жапаров мамлекет өз тарабынан активдүү жаштарды колдоого алып, спорттук жетишкендиктерге дем берүүгө милдеттүү экенин белгилеп, өзүнүн фондунан Владислав Шуликого 500 миң сом бөлгөн.

"Кандай гана кыйынчылык болбосун өзүңө ишенүү жана максатыңа жетүү керектигин өз мисалыңда көрсөттүң. Буга чейин мындай эч ким кылган эмес. Бүт өлкө сенин сүзгөнүңдү байкап жана абдан кабатырланып жатты", - деген Жапаров.

Спортчунун 22-августта Караколдон башталган марафону 27-августта Балыкчыда ийгиликтүү жыйынтыкталган. Шулико бир катар эл аралык таймаштарга катышып, байгелүү орундарды ээлеп келген.