"Унаа" мекемесинен "айдоочулук күбөлүк сатылат" деген депутатка жооп беришти

Жогорку Кеңештин жыйынында депутат Айбек Осмонов жол кырсыгынын көбөйүшүнүн себебин айдоочулук күбөлүктөр сатылып жатканы менен байланыштырган.

Санариптик өнүктүрүү министрлигине караштуу "Унаа" мамлекеттик мекемеси депутаттын маалыматы чындыкка дал келбей турганын билдирди.

"Унаа" бөлүмдөрүндө айдоочулук күбөлүктөр сатылбайт деп расмий түрдө айта алабыз. Бир нече жылдан бери талапкерлер автоматташтырылган маалыматтык системалар аркылуу сынактан өтүшөт. Тестирлөө системасында "Face ID" технологиясы колдонулуп, курсанттар бир көз ирмемде идентификацияланат. Идентификациялоо веб-камеранын жардамы менен жүргүзүлөт. Бул курсанттын ордуна башка адамдардын тестирлөөдөн өтүшүн жокко чыгарат, ал эми тесттик суроолор аралаш тартипте түзүлөт. Ошондой эле автоматташтырылган маалымат системасында түзүлгөн теориялык экзамендеги суроолор боюнча иштер жүргүзүлүп, адам фактору минималдаштырылган. Коррупциялык көрүнүштөр же укук бузуулар болгон фактылар болгон учурда тийиштүү чараларды көрүү үчүн ыйгарым укуктуу органдарга кайрылууну суранабыз", - деп жазылат маалыматта.