Чүйдө мүмкүнчүлүгү чектелген 70 адамга майыптар арабасы тапшырылды

Чүй облусунда ден соолугунун мүмкүнчүлүгү чектелген 70 адамга көп функционалдуу майыптар арабасы тапшырылды. Бул тууралуу Саламаттыкты сактоо жана социалдык өнүктүрүү министрлигинен билдиришти.

Маалыматка ылайык, майыптар арабасы "Катар-Черити" кайрымдуулук фонду жана Саламаттыкты сактоо жана социалдык өнүктүрүү министрлиги менен биргеликте тапшырылган.

"Министрлик калктын социалдык аярлуу катмарына, айрыкча ден соолугунун мүмкүнчүлүгү чектелген жарандарга жеңилдиктерди жана колдоо кызматтарын көрсөтүү үчүн түздөн-түз жооп берет. Бул жагынан биздин өнөктөштөрдүн колдоосу абдан маанилүү. "Катар-Черити" кайрымдуулук фонду биздин негизги жана эң маанилүү өнөктөштөрүбүздүн бири. Бул фонддун жардамы менен Кыргыз өлкөсүндө 29 баланын угуу жөндөмү калыбына келтирилип, жүрөк оорусу менен ооруган 50 балага операция жасалды. "Катар-Черити" кайрымдуулук фонду Кыргыз өлкөсүнө гуманитардык иш-чараларды ийгиликтүү жүргүзүп жатат жана бул үчүн терең ыраазычылыгыбызды билдиребиз ", - дейт министр Алымкадыр Бейшеналиев.