Адахан Мадумаров: "Качантан бери чек ара кызматын ИИМ башкарып калды эле?"

"Бүтүн Кыргызстан" саясий партясынын мүчөсү, активист Орозайым Нарматованын Ош аэропортунан кармалышы боюнча буйрук башка жактан келген. Бул тууралуу "Бүтүн Кыргызстан" саясий партясынын лидери Адахан Мадумаров SUPER.KG порталына билдирди.

"Качантан бери чек ара кызматын Ички иштер башкармалыгы башкарып калган? Качантан бери ушундай иш башталган? Чек араны качантан бери ИИМ көзөмөлдөп калган? Демек, буйрук башка жактан кеткенинин белгиси.

Экинчиден жактоочусу жетип келсе дагы жолугуштурбаптыр. Караңгы, арткы тешиктерден алып чыгып, унаага салып келе жатышат. Эң коркунучтуусу бийликти басып алууга чакырык жасаган деп жатышат. Кайсы бийликти? Качан? Кайсы жерден? Ал кыз канча жылдан бери Москвада жашап, окуп, иштеп жүрөт. Бул өтө эле чектен чыккандык", - деди Адахан Мадумаров.

Бүгүн, 10-сентябрь күнү таңга жуук "Бүтүн Кыргызстан" партиясынын мүчөсү, активист Орозайым Нарматова Ош аэропортунан укук коргоо органдары тарабынан кармалгандыгы маалымдалган.