Адахан Мадумаров: "Жалгыз уулун жоготкон Орозайым Нарматованын атасынын кан басымы көтөрүлүп жатат"

"Бүтүн Кыргызстан" саясий партясынын мүчөсү, активист Орозайым Нарматованын 70 жаштан ашып калган атасынын кан басымы көтөрүлүп жатат. Бул тууралуу партия лидери Адахан Мадумаров SUPER.KG порталына билдирди.

"Орозайымдын атасынын Москвага учуп жаткан төрт небересинин документтери Орозайымдын сумкасында калыптыр. Эми алар Москвага барса кандай күнгө кабылат деп мага атасы телефон чалды. Ал кызын өзү түндө алып келип узатыптыр, эми кан басымы көтөрүлүп жатканын айтты. Жакында эле жалгыз уулун жерге берип, каны кайнап турган 70тен ашкан аксакалдын абалын элестетип көрүңүз. Түшүнүп жатасызбы жагдайды?", - деди Мадумаров.

Бүгүн, 10-сентябрь күнү таңга жуук "Бүтүн Кыргызстан" партиясынын мүчөсү, активист Орозайым Нарматова Ош аэропортунан укук коргоо органдары тарабынан кармалгандыгы маалымдалган. Өз кезегинде Ички иштер министрлиги Орозайым Нарматованын билдирүүлөрүндө Кыргыз Республикасынын бийлигинин ишмердүүлүгүнө карата терс чакырыктарды жасаган белгилер бар экендигин айтты.