Биринчи Май райондук соту: "Орозайым Нарматованын баш коргоо чарасын кароо боюнча өтүнмө келе элек"

"Бүтүн Кыргызстан" партиясынын мүчөсү Орозайым Нарматованын баш коргоо чарасын кароо боюнча өтүнмө келе элек. Бул тууралуу Биринчи Май райондук сотунан билдиришти.

"Азыркы убакытка чейин Бишкек шаарынын Биринчи Май райондук сотуна Нарматовага карата бөгөт коюу чарасын колдонуу тууралуу өтүнмө келип түшкөн эмес. Андыктан ага карата эч кандай бөгөт коюу чарасы тандалган жок", - дешти басма сөз кызматынан.

Бүгүн, 10-сентябрь күнү таңга жуук "Бүтүн Кыргызстан" партиясынын мүчөсү, активист Орозайым Нарматова Ош аэропортунан укук коргоо органдары тарабынан кармалгандыгы маалымдалган. Өз кезегинде Ички иштер министрлиги Орозайым Нарматованын билдирүүлөрүндө Кыргыз Республикасынын бийлигинин ишмердүүлүгүнө карата терс чакырыктарды жасаган белгилер бар экендигин айтты.