Күбө катары сурак берген Орозайым Нарматова кайрылуу жасады. Сурактан кийинки сүрөтү

"Бүтүн Кыргызстан" партиясынын мүчөсү Орозайым Нарматова ИИМге сурак берип чыккандан кийин билдирүү жасады. Айтымында, азыркы тапта ал туугандарынын үйүндө.

"Урматтуу мекендештер, мага колдоо көрсөтүп, көңүл айтып, чындык үчүн бир болгонуңуздар үчүн ыраазычылык билдирем! Азыр мени атайын кызматкерлер туугандарымдын үйүнө алып келишти. Буюрса, эртең менен Москва шаарына узатып коюшат. Менде баары жакшы! Тергөө иштерин ачыктабоо боюнча кол койдум, түшүндүрүү иштери болду, рахмат баарыңыздарга.

Буюрса, кененирээк эртең айтам, Кудайым ыраазы болсун баарыңыздарга! Сиздерди кыжаалат кылганым үчүн кечирим сурайм", - деп айтылат билдирүүдө.

Белгилей кетсек, 10-сентябрь күнү таңга жуук "Бүтүн Кыргызстан" партиясынын мүчөсү, активист Орозайым Нарматова Ош аэропортунан укук коргоо органдары тарабынан кармалгандыгы маалымдалган. Өз кезегинде Ички иштер министрлиги Орозайым Нарматованын билдирүүлөрүндө Кыргыз Республикасынын бийлигинин ишмердүүлүгүнө карата терс чакырыктарды жасаган белгилер бар экендигин айтты.

Кийинчерээк Нарматованын Өзгөндөгү үйүнө тинтүү жүргүзүлүп, тиешелүү материалдарды Бишкек шаарына жөнөтүлгөнү маалымдалды.

Андан соң ИИМдин маалымат кызматы Нарматова күбө катары сурак бергенден кийин бошотулганын билдиришти.