Европа кеңешинин президенти Садыр Жапаровду Брюсселге келип кетүүгө чакырды

Тышкы иштер министри Руслан Казакбаевдин Европа биримдигинин Борбордук Азия боюнча атайын өкүлү Тери Хакала менен кезектеги жолугушуусу болуп өттү. Бул тууралуу аталган министрликтин басма сөз кызматынан билдиришти.

Тараптар алдыда боло турган жогорку деңгээлдеги эки тараптуу жана регионалдык иш-чаралардын графигин, 2021-2027-жылдарга көп жылдык индикативдүү программанын алкагында бюджеттик колдоонун артыкчылыктарын талкуулоону улантышты.

Ошондой эле 5-ноябрда Бишкекте өтө турган Европа биримдиги - Борбор Азия биринчи экономикалык форумун уюштуруу маселелерин талкуулашты.

Ооганстандын айланасындагы учурдагы кырдаал боюнча пикир алмашып, тынчтыкты сактоо жана өлкөдө зомбулуктун алдын алуу боюнча жалпы кызыкдарлыгын белгилешти. Тараптар Европа биримдигинин бул багыттагы ыкмаларын жана андан аркы пландарын, ошондой эле ооган калкына, анын ичинде Чоң жана Кичи Памирдеги этникалык кыргыздарга гуманитардык жардам көрсөтүү мүмкүнчүлүгүн карашты.

Анда Европа биримдигинин президенти Шарль Мишель Садыр Жапаровду ыңгайлуу убакта Брюсселге келип кетүүгө чакырганы айтылды.

Сүйлөшүүнүн аягында тараптар күн тартибиндеги бардык маселелер боюнча байланышта болууга макулдашты.