Феминисттер белгилүү футболчу Криштиану Роналдуга каршы нааразычылык акциясын өткөрүштү

"Level Up" феминисттик кыймылы белгилүү португалиялык футболчу Криштиану Роналдуга каршы нааразычылык акциясын өткөрдү. Бул тууралуу чет элдик басылмалар жазып чыгышты.

Маалыматка ылайык, Англиядагы "Олд-Траффорд" стадионунда "Манчестер Юнайтед" менен "Ньюкасл" беттеши жүрүп жаткан учурда модель Кэтрин Майоргини колдогон жазуулар жазылган учак стадиондун үстүнөн учуп өткөн. Ал беттеште Криштиану Роналду "Манчестер Юнайтедге" кошулгандан бери алгачкы ирет талаа үстүнө чыккан. Феминисттер мындай аракети менен 2009-жылы Криштиану Роналду зордук көрсөттү делген модель айымдын ишине көпчүлүктүн көңүлүн бурууга аракет кылышкан.

Эске салсак, Кэтрин Майорги 2018-жылы португалиялык футболчунун үстүнөн арызданган. Ал 2009-жылы Лас-Вегаста Роналду тарабынан зордукталганын айтып чыккан. Моделдин айтымында, футболчунун тарапташтары окуя боюнча эч кимге сөз чыгарбоо үчүн ага 375 миң доллар төлөп беришкен.

Ал эми 2020-жылы Майорги португалиялык футболчуга карата жазган арызын кайрадан козгоп чыккан. Ал учурунда ооз ачпоо боюнча келишимдин шарттарын түшүнүү мүмкүн болбой калганын билдирген.

Криштиану Роналду өзүнө карата коюлуп жаткан айыптоолорду толугу менен четке кагып келет.