Балиде жүздөгөн өлгөн канаттуулар табылды (видео)

Бали аралынын тургундары Гианьяр аймагындагы көрүстөндөн жүздөгөн өлгөн канаттууларды табышты. Бул тууралуу чет элдик маалымат каражаттары жазып чыгышты.

Маалыматка ылайык, аталган аймакта канаттуулардын массалык өлүмү биринчи жолу катталууда. Индонезиянын жаратылыш ресурстарын сактоо борбору канаттуулардын өлүмү кислота жамгырынан улам болушу мүмкүн деп эсептейт. Ал эми экологдордун айтымында, канаттуулар пестициддердин (өсүмдүк илдеттерине, мал мителерине жана коркунучтуу оорулардын таралуусуна каршы күрөшүү үчүн колдонулуучу химиялык каражаттар) айынан өлгөндүгүн жана ал аймакта бул каражаттар активдүү колдонуларын тастыкташкан.

Белгилей кетсек, буга чейин дагы июль айында Бойсман булуңунда жергиликтүү тургундар пляжда өлгөн канаттууларды табышкан.