Аба каттамдарын ачуу, инвестиция тартуу, айыл чарба азыктарын экспорттоо талкууланды. Талант Мамытов Кореянын элчиси менен жолукту

Жогорку Кеңештин төрагасы Талант Мамытов Кореянын Кыргыз мамлекетиндеги атайын жана толук ыйгарым укуктуу элчиси Ли Вонджэни кабыл алды. Бул тууралуу парламенттин басма сөз кызматынан билдиришти.

Алгач Талант Мамытов Ли Вонджэни Кыргыз мамлекетиндеги дипломатиялык ишмердүүлүгүнүн башталышы менен куттуктап, элчи катары эки өлкөнүн алакасын өнүктүрүү үчүн өзгөчө салым кошоруна ишеним артарын кошумчалады.

Ошондой эле Мамытов эки өлкөнүн кызматташтыгына токтолду. “Корея биз үчүн маанилүү өнөктөш мамлекеттердин бири. Быйыл эки өлкөнүн дипломатиялык кызматташуусунун калыптангандыгына 30 жыл толду. Мындан ары да алакаларыбызды арттырып, жаңы деңгээлге көтөрүшүбүз зарыл. Эки өлкөнүн соода жүгүртүүсүнүн көлөмү 100 миллион долларды гана түзөт. Андыктан бул жааттагы кызматташтыкты өнүктүрүү учур талабы”, - деди ал.

Өз кезегинде Кореянын Кыргыз мамлекетиндеги атайын жана толук ыйгарым укуктуу элчиси Ли Вонджэ жылуу кабыл алгандыгы үчүн Жогорку Кеңештин төрагасына ыраазычылык билдирип, дипломатиялык ишмердүүлүгүнүн алкагында жигердүү иш алып барарын белгиледи.

“Корея Республикасы Кыргыз мамлекети менен ар тараптуу алакаларды арттырууга кызыкдар. Соода-экономикалык, маданий-гуманитардык жана парламенттер аралык кызматташтыкты өнүктүрүү артыкчылыктуу максаттарыбыздын бири”, – деди Ли Вонджэ.

Ошондой эле элчи Талант Мамытовго Кыргыз өлкөсүнүн эгемендүүлүгүнүн 30 жылдыгына карата Корея парламентинин төрагасы Пак Бён Соктун куттуктоо катын тапшырды.

Жолугушууда мындан сырткары түз аба каттамдарын ачуу, Кыргыз мамлекетине инвестиция тартуу, Кореяга айыл чарба азыктарын экспорттоо өңдүү бир катар маселелер да талкууланды.